Покаянный молебен о прощении греха детоубийства (аборта)

Иерей: Благословен Бог наш: Лик (чтец): Аминь. Царю небесный: Трисвятое по Отче наш: Господи, помилуй, (12) Слава и ныне: Приидите, поклонимся, Цареви нашему Богу. Приидите, поклонимся и припадем Христу, Цареви нашему Богу. Приидите, поклонимся и припадем самому Христу, Цареви и Богу нашему.

Псалом 50: Помилуй мя Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя; яко беззаконие мое аз знаю, и грех мой предо мною есть выну. Тебе единому согреших и лукавое пред Тобою сотворих; яко да оправдишися во словесех Твоих, и победиши внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси, окропиши мя иссопом, и очищуся; омыеши мя, и паче снега убелюся, Слуху моему даси радость и веселие; возрадуются кости смиренныя. Отврати лице Твое от грех моих и вся беззакония моя очисти. Сердце чисто созижди во мне, Боже, и и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего: возрадуется язык мой правде Твоей. Господи, устне мои отверзеши и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен; сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския: тогда благоволиши жертву правды, возношение и всесожигаемая: тогда возложат на олтарь Твой тельцы. Слава, и ныне: Аллилуия, трижды Глас 4: Бог Господь, и явися нам, благословен Грядый во имя Господне: Таже тропарь, глас 4: Иисусу рождшуся в Вифлееме Иудейстем,/ Иудейская держава упразднися./ Да играют младенцы, за Христа закалаеми,/ Иудея да рыдает:/ глас бо слышан бысть в Раме,/ Рахиль, плачущи, рыдает по чадех своих,/ младенцы бо избив, Ирод пребеззаконный/ Иудею насыщая неповинныя крове;/ и земля убо червленяшеся кровьми младенцев,/ от язык же Церковь таинственне очищается/ и в красоту одеяется./ Прииде Истина,/ Бог явися в сени седящим,/ от Девы родивыйся, во еже спасти нас. Слава и ныне: К Богородице прилежно ныне притецем,/ грешнии и смиреннии, и припадем,/ в покаянии зовуще из глубины души:/ Владычице, помози, на ны милосердовавши;/ потщися, погибаем от множества прегрешений;/ не отврати Твоя рабы тщи:/ Тя бо и едину надежду имамы.

КАНОН ПОКАЯННЫЙ.

Глас 6:

Песнь 1. Ирмос: Яко по суху пешешествовав Израиль, по бездне стопами, гонителя фараона видя потопляема, Богу победную песнь поим, вопияше.

Припев: Помилуй мя, Боже, помилуй мя. Како отверзу уста моя нечистая, како начну плакатися беззаконных моих деяний, Агнче Божий, вземляй грехи мира, услыши стенание мое и скорби сердца моего вонми, возьми мое тяжкое бремя греховное; понесый немощи наша, приими в покаянии припадающих к Тебе. Помилуй мя, Боже, помилуй мя. О, горе мне грешному! Паче всех человек окаянен есмь: покаяния несть во мне; даждь ми, Господи, слезы, да плачуся дел моих горько. Пресвятая Богородице, спаси нас. Мати Божия Пречистая, воззри на мя грешнаго, и от сети диаволи избави мя, и на путь покаяния настави мя, да плачуся дел моих горько. Святии мученицы Вифлеемстии, молите Бога о нас. Чертог брачный отверзеся днесь младенцем, убиенным за Христа и Бога, врагов побеждая начала и власти, и Иродов обличая безумный гнев смысленно. Слава и ныне.

Песнь 3. Ирмос: Несть свят, якоже Ты, Господи Боже мой, вознесый рог верных твоих, Блаже, и утвердивый нас на камени исповедания Твоего. Помилуй мя, Боже, помилуй мя. Глаголы жизни Твоея презрех, Господи, и по воли сердца моего ходих от юности моея даже до сего дне, и яко Ирод беззаконный в ослеплении гордыни и обольщении бесовском пребывая, убивах детей своих неродившихся. О, горе мне грешному! Помилуй мя, Боже, помилуй мя. Внегда поставлени будут престоли на судище страшнем, тогда всех человек дела обличатся: горе тамо будет грешным, в муку отсылаемым: и то ведущи, душе моя, покайся от злых дел твоих. Пресвятая Богородице, спаси нас. Се, взывает, Госпоже, Сын Твой, и поучает нас на доброе, аз же грешный добра всегда бегаю: но Ты, Милостивая, помилуй мя, да покаюся от злых дел моих. Святии мученицы Вифлеемстии, молите Бога о нас. Страдальцы дети — сверстницы Христова воплощения, Иродово неразумное ослепиша неистовство и очи всесветлии Церкви явишася. Слава и ныне. Таже: Избави от бед рабы Твоя, Многомилостиве,/ яко мы усердно к Тебе прибегаем,/ милостивому Избавителю, всех Владыце, Господу Иисусу. Спаси от бед рабы Твоя, Богородице,/ яко вси по Бозе к Тебе прибегаем,/ яко к Нерушимей Стене и Предстательству. Призри благосердием, Всепетая Богородице,/ на мое лютое телесе озлобление,/ и исцели души моея болезнь. Молите Бога о нас, святии мученицы Вифлеемстии,/ яко мы усердно к вам прибегаем,/ скорым помощником и молитвенником о душах наших.

Песнь 4. Ирмос: Христос моя сила, Бог и Господь, честная Церковь боголепно поет, взывающи от смысла чиста, о Господе празднующи. Помилуй мя, Боже, помилуй мя. Владыко мой и Творче, Ты заповедал еси чрез Моисея закон Твой, аз же, скверный, презрех заповеди Твоя, предахся плотским сластем, попечение о плоти извратив в похоти, имже служах, яко раб купленный, забыв день Суда и праведного воздаяния Твоего. Помилуй мя, Боже, помилуй мя. Широк путь зде и угодный сласти творити, но горько будет в последний день, егда душа от тела разлучатися будет: блюдися от сих, человече, Царствия ради Божия. Пресвятая Богородице, спаси нас. Госпоже Богородице, помилуй мя грешнаго, и в добродетели укрепи, и соблюди мя, да наглая смерть не похитит мя неготоваго, и доведи мя, Дево, Царствия Божия. Святии мученицы Вифлеемстии, молите Бога о нас. Младенец множество мученически, по Бозе вси пострадавше, почести горнего звания от Него приемлют: ихже ради Ирод беззаконным вменися. Слава и ныне. Песнь 5. Ирмос: Божиим светом Твоим, Блаже, утренюющих Ти души любовию озари, молюся: Тя ведети, Слове Божий, истиннаго Бога, от мрака греховного взывающа. Помилуй мя, Боже, помилуй мя. Жизни Подателю, веков Творче, Царю мой и Боже мой, за многая Твоя блага воздах Тебе злом, окаянный; отвергох пренебесный дар жизни, посланная от Тебе чада погубих, и душу мою во тьму ада предах, но многия скорби и болезни по делом разбойничим приемля, во смирении молю: помяни мя, Господи, во Царствии Твоем. Помилуй мя, Боже, помилуй мя. Блудника и разбойника кающася приял еси, Спасе: аз же един леностию греховною отягчихся, и злым делом поработихся: душе моя грешная, сего ли восхотела еси? Пресвятая Богородице, спаси нас. Дивная и скорая Помошнице всем человеком, Мати Божия, помози мне недостойному, душа бо моя грешная сего восхоте. Святии мученицы Вифлеемстии, молите Бога о нас. Скверноубийства кровьми Ирод оскверняется: Владыку бо всех, Бога и Царя убити покушаяся, на отроки неистовствует и свирепствует люте. Слава и ныне.

Песнь 6. Ирмос: Житейское море воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве. Помилуй мя, Боже, помилуй мя. Заблудих яко овча погибшее, омрачихся умом в житейских страстех, не могу воззрети к Тебе в болезни, не могу согретися слезами, яже к Тебе любве; но Ты, Владыко, яко Пастырь добрый, не остави мене погибающа, даруй мне покаяние всецелое, осияй мя милостию Твоею и очисти душу от безмерной тяжести греха детоубийства. Помилуй мя, Боже, помилуй мя. Воспряни, окаянный человече, к Богу, воспомянув своя согрешения, припадая ко Творцу, слезя и стеня, Тойже, яко милосерд, даст ти ум знати волю Свою. Пресвятая Богородице, спаси нас. Богородице Дево, от видимаго и невидимаго зла сохрани мя, Пречистая, и приими молитвы моя, и донеси я Сыну Твоему, да даст ми ум творити волю Свою. Святии мученицы Вифлеемстии, молите Бога о нас. Рахиль убо, чад плачущи, древле провозвести за Христа младенцев, приемших безгодное заколение: увы мне, вопиет, утешитися не хотящи. Слава и ныне. Кондак, глас 6: Душе моя, душе моя, восстани, что спиши; конец приближается, и имаши смутитися: воспряни убо, да пощадит тя Христос Бог, везде сый и вся исполняяй.

Иерей: Паки и паки миром Господу помолимся. Заступи, спаси, помилуй: Пресвятую, Пречистую, Преблагословенную: Таже молитва: Господи Боже наш, покаянием оставление человеком даровавый и во образ познания грехов и исповедания пророка Давида покаяние к прощению показавый, Сам Владыко, во многая ны и великая впадшия согрешения, помилуй по велицей милости Твоей, и по множеству щедрот Твоих, очисти беззакония наша: яко Тебе согрешихом, Господи, безвестная и тайная сердца человеческаго ведущему, и Единому имущему власть оставляти грехи. Сердце же чисто создав в нас, и Духом Владычним утвердив нас, и радость спасения Твоего сказав нам, не отрини нас от Лица Твоего: но благоволи яко Благ и Человеколюбец, даже до последнего нашего издыхания, приносити Тебе жертву правды, и возношение во святых Твоих жертвенницех. Ты бо еси Царь мира и Спас душ наших: и Тебе славу возсылаем, Отцу, и Сыну, и Святому Духу, ныне и присно, и во веки веков. Аминь. Вонмем, Премудрость, вонмем. Прокимен, глас 6: Хвалите, отроцы, Господа, хвалите имя Господне. Стих: Вселяя неплодовь в дом, матерь, о чадех веселящуся. Премудрость. Апостол к римлянам, зачало 93 Аллилуия, глас 5: Пролияша кровь их, яко воду. И по сем: И о сподобитися нам слышанию Святаго Евангелия, Господа Бога молим.

Лик: Господи, помилуй, трижды.

Евангелие от Матфея, зачало 4 По Евангелии стихира,

глас 1: Пречистому Твоему Рождеству, Христе Боже, первая жертва бысть младенцы: Ирод бо яти Тя, неятаго, восхотев, не позна, мученический приводя Тебе лик. Темже Тя молим, вочеловечшагося, спасти души наша. Слава и ныне,

глас 6: Не имамы иныя помощи, не имамы иныя надежды, разве Тебе, Владычице, Ты нам помози, на Тебе надеемся, и Тобою хвалимся: Твои бо есмы раби, да не постыдимся.

Песнь 7. Ирмос: Росодательну убо пещь содела ангел преподобным отроком, халдеи же опаляющее веление Божие, мучителя увеща вопити: благословен еси, Боже отец наших. Помилуй мя, Боже, помилуй мя. Хищницы, убийцы, татие и вси нераскаяннии грешницы Царствия Божия не наследуют; аз же всякою неправдою и мерзкими грехми оскверних тело и душу мою; таковаго ради бедствия моего, из рова погибели к Тебе, Владыко мой, взирая, зову: Помилуй мя, Боже, помилуй мя. Уязвихся прелестию мира сего и приклоних колена пред ним, пагубный путь мерзкаго закона его избрав и обеты Крещения забыв, и по степенем преступлений нисходя, яже лукаво предложи мне мир, достигох самыя глубины смертнаго греха — чадоубийства; но объятия Твоя, Отче, отверзи мне человеколюбно, да поне до конца дней моих приношу Ти жертву чисту — сердце мое, покаянием сокрушенное. Пресвятая Богородице, спаси нас. Богородице, Надеждо и Предстательство Тебе поющих, возьми бремя от мене тяжкое греховное и, яко Владычица Чистая, кающася приими мя. Святии мученицы Вифлеемстии, молите Бога о нас. Незлобива жертва и нескверная за Тебе предзакалается, Божий Слове, вопиющи: благословен еси, Господи, Боже отец наших. Слава и ныне. Песнь 8. Ирмос: Из пламени преподобным росу источил еси, и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки. Помилуй мя, Боже, помилуй мя. Юность моя в безумии пройде, все житие мое иждих во гресех, в лености и нерадении, но старость моя ужасом неминуемого Суда Твоего приведе мя к покаянию; не отрини мене, Спасе мой, во единонадесятый час к Тебе пришедшаго, и к милосердию Твоему взывающаго: Помилуй мя, Боже, помилуй мя. Верую, яко приидеши судити живых и мертвых, и вси в своем чину станут, старии и младии, владыки и князи, девы и священницы: где обрящуся аз; сего ради вопию: даждь ми, Господи, прежде конца покаяние. Пресвятая Богородице, спаси нас. В жизни земной превеликия скорби претерпела еси, Пречистая Дево, смиренно приявши от Творца неизъяснимое материнства послушание, аз же, раб неключимый, како отвергохся от Бога посылаемаго родительства? Чесо ради чада невинная погубих? Адская утроба алчет мя сквернаго, но Ты, Мати Пресвятая, покрый милосердием Твоим безумное мое окаянство, испроси у Сына Твоего прощение лютых моих, и в день Страшного Суда засвидетельствуй сердечное раскаяние мое. Святии мученицы Вифлеемстии, молите Бога о нас. Множество неискусозлобное воинствует Владыце днесь кровию и на Ирода твердо вооружается, Тебе, Христе, рождшуся; темже вопием, воспевающе: благословите, вся дела Господня, Господа. Слава и ныне.

Песнь 9. Ирмос: Бога человеком невозможно видети, на Негоже не смеют чини ангельстии взирати: Тобою же, Всечистая, явися человеком Слово воплощенно: Егоже величающе, с небесными вои Тя ублажаем. Помилуй мя, Боже, помилуй мя. Совокупи убо Давид иногда беззаконию беззаконие: убийству же любодейство растворив, покаяние сугубое показа абие: аз же, окаянный, во многая убийства впав, ни капли слез имею от жестосердия, но к Твоему Благоутробию припадая, яко Давид вопию: Помилуй мя, Боже, помилуй мя. Преблагий Боже, призри с высоты Святыя Твоея на землю нашу Русскую и силою Твоею сокруши и разори жертву беззаконную, народом нашим сатане приносимую, благодатию Твоею преобрази греховное естество наше, дух прав обнови в народе нашем, не отвержи нас от лица Твоего, и Духа Твоего Святаго не отыми от земли Русстей, да в покаянии зовем: помилуй нас. Пресвятая Богородице, спаси нас. Поем Тя, благословим Тя, поклоняемся Тебе, Богородительнице, яко Нераздельныя Троицы породила еси Единаго Христа Бога, и Сама отверзла еси нам, сущим на земли, небесная. Святии мученицы Вифлеемстии, молите Бога о нас. Мерзко Иродово детоубийство и чиста детей жертва, яко сверстных Христу нашего спасения. Не плачи, Рахиль, чад, поминающи недра Авраамова, идеже всех есть веселящихся жилище. Слава и ныне. Также: Достойно есть; Ектения сугубая: Помилуй нас, Боже: Еще молимся о великом господине: Еще молимся о богохранимей стране нашей: Еще молимся о милости, жизни, мире, здравии, спасении, посещении рабов Божиих имярек, и поминает ихже хощет. По возгласе: Ко Господу, со умилением сердец, колена преклоньше, помолимся: Лик: Господи, помилуй, трижды.   Иерей чтет молитву: Господи, Иисусе Христе, Сыне Божий, Источниче жизни и безсмертия, пришедый в мир грешныя спасти! Нас ради человек и нашего ради спасения вочеловечивыйся и родитися изволивый от Приснодевы Марии, злобу мира людскаго от младых лет извЕдый, (ударение) и мученичество младенцев Вифлеемских, за Тебя умерщвленных, благословивый, и кровь их неповинную основанием Церкве святых явивый! Сам убо, Господи, Спасителю наш, призри на нас грешных и недостойных рабов Твоих, выю сердца и телесе пред величеством славы Твоея приклонивших. Согрешихом, беззаконновахом, неправдовахом пред Тобою, но да не яростию Твоею обличиши нас, ниже гневом Твоим накажеши нас. Тебе Единому согрешихом, но Тебе Единому и покланяемся и сокрушенным сердцем, яко жертву чистую, исповедание Тебе приносим: Прости, Благоутробне Господи, нас, возлюбивших страсти более закона Твоего, поправших заповеди Твоя и в безумии убивавших детей своих не родившихся, иных к сему смертному греху подвигавших или преступному их намерению не возбранивших. Вемы, яко достойны есмы огня геенскаго и вечныя муки, но к безмерному человеколюбию Твоему взываем, Господи; призри на искреннее раскаяние наше, приими сердце, сокрушенное безмерною тяжестию содеяннаго, да победит множество щедрот Твоих грехов наших лукавое соборище. Имамы, Господи, Человеколюбия Твоего образ: разбойника, мытаря, блудницу, блуднаго сына, иже вси паче нас в покаянии благоискусствующе, в Небесное Царство предвзыдоша. С ними же убо и ны, исповедающихся и припадающих Ти, приими, Владыко. Избави нас от належащаго и праведнаго Твоего прещения, губительства, труса, потопа, огня, меча, нашествия иноплеменных и междоусобныя брани, и от всякия смертоносныя язвы. Призри, всесильне Господи, на землю нашу Русскую и на люди Твоя: вразуми творящих беззакония, возсияй истиною Твоею в сердцах заблудших и во тьме пребывающих братий, сестер и чад наших; разум матерей, приносящих своих чад не родившихся в жертву беззаконную дьяволу, просвети, руку врача-детоубийцы удержи, всесильною десницею Твоею пресеки Иродово кровавое беззаконие, на земли нашей творимое. Многомилостиве и долготерпеливе Господи, Иисусе Христе, Боже наш, не хотяй смерти грешников, даруй и нам время на покаяние, яко да и настоящих зол, и будущих вечных мук свободимся, молитвами святых мучеников младенцев Вифлеемских, ходатайством Пресвятыя Владычицы нашея Богородицы, благодатию и человеколюбием Безначального Твоего Отца, с Нимже благословен еси, со Пресвятым, и Благим и Животворящим Твоим Духом, ныне и присно и во веки веков.

Лик: Аминь. Иерей:

Премудрость: Пресвятая Бог ородице, спаси нас: И отпуст.    

Величание: Величаем, величаем вас, святии мученицы Вифлеемстии, и чтим честная страдания ваша, яже за Христа претерпели есте.