Текст Божественной литургии на церковно-славянском языке.

01.07.2014  |  Добавил: Admin

Для народного пения.

Диакон: Благослови, владыко.

Иерей: Благословенно Царство Отца и Сына и Святаго Духа, ныне и присно и во веки веков.

Люди: Аминь.

Великая ектения

Диакон: Миром Господу помолимся.

Люди: Господи, помилуй. (На каждое прошение.)

О Свышнем мире и спасении душ наших, Господу помолимся.

О мире всего мира, благостоянии Святых Божиих Церквей и соединении всех, Господу помолимся.

О святем храме сем и с верою, благоговением и страхом Божиим входящих в онь, Господу помолимся.

О великом Господине и Отце нашем Святейшем Патриархе Кириллеи о Господине нашем, Высокопреосвященнейшем митрополите Павле, честнем пресвитерстве, вo Христе диаконстве, о всем причте и людех, Господу помолимся.

О Богохранимей стране нашей, властех и воинстве ея, Господу помолимся.

О граде сем, всяком граде, стране и верою живущих в них, Господу помолимся.

О благорастворении воздухов, о изобилии плодов земных и временех мирных, Господу помолимся.

О плавающих, путешествующих, недугующих, страждущих, плененных и о спасении их. Господу помолимся.

О избавитися нам от всякия скорби, гнева и нужды, Господу помолимся.

Заступи, спаси, помилуй и сохрани нас, Боже, Твоею благодатию.

Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе и друг друга, и весь живот наш Христу Богу предадим.

Люди: Тебе, Господи.

Иерей: Яко подобает Тебе всякая слава честь и поклонение, Отцу и Сыну и Святому Духу, ныне и присно и во веки веков.

Люди: Аминь.

Первый антифон

Благослови, душе моя, Господа./ Благословен еси, Господи./ Благослови, душе моя, Господа,/ и вся внутренняя моя Имя святое Его. Благослови, душе моя, Господа,/ и не забывай всех воздаяний Его./ Очищающаго вся беззакония твоя,/ исцеляющаго вся недуги твоя./ Избавляющаго от истления живот твой,/ венчающаго тя милостию и щедротами. Исполняющаго во благих желание твое:/ обновится, яко орля, юность твоя./ Щедр и милостив Господь, /долготерпелив и многомилостив./ Благослови, душе моя, Господа,/ и вся внутренняя моя,/ имя святое Его./ Благословен еси, Господи.

Ектения малая

Диакон: Паки и паки миром Господу помолимся.

Люди: Господи, помилуй.

Диакон: Заступи, спаси, помилуй и сохрани нас, Боже, Твоею благодатию.

Люди: Господи, помилуй.

Диакон: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.

Люди: Тебе, Господи.

Иерей: Яко Твоя держава, и Твое есть Царство, и сила, и слава, Отца и Сына и Святаго Духа, ныне и присно и во веки веков,

Люди: Аминь.

Слава Отцу и Сыну/ и Святому Духу./

Второй антифон

Хвали, душе моя, Господа./ Восхвалю Господа в животе моем,/ пою Богу моему, дондеже есмь./ Не надейтеся на князи, на сыны человеческия,/ в них же несть спасения./ Изыдет дух его, и возвратится в землю свою:/ в той день погибнут вся помышления его./ Блажен, емуже Бог Иаковль помощник его,/ упование его на Господа Бога своего./ Сотворшаго небо и землю,/ море и вся, яже в них./ Хранящаго истину в век,/ творящаго суд обидимым,/ дающаго пищу алчущим./ Господь решит окованныя,/ Господь умудряет слепцы./ Господь возводит низверженныя,/ Господь любит праведники./ Господь хранит пришельцы,/ сира и вдову приимет,/ и путь грешных погубит./ Воцарится Господь во век,/ Бог твой, Сионе, в род и род.

И ныне и присно и во веки веков. Аминь/.

Песнь Господу Иисусу Христу

Единородный Сыне и Слове Божий, Безсмертен Сый,/ и изволивый спасения нашего ради/ воплотитися от Святыя Богородицы и Приснодевы Марии,/ непреложно вочеловечивыйся;/ распныйся же, Христе Боже, смертию смерть поправый,/ един Сый Святыя Троицы,/ спрославляемый Отцу и Святому Духу, спаси нас.

Ектения малая

Диакон: Паки и паки миром Господу помолимся.

Люди: Господи, помилуй.

Диакон: Заступи, спаси, помилуй и сохрани нас, Боже, Твоею благодатию.

Люди: Господи, помилуй.

Диакон: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.

Люди: Тебе, Господи.

Иерей: Яко благ и Человеколюбец Бог еси, и Тебе славу возсылаем, Отцу и Сыну и Святому Духу, ныне и присно и во веки веков.

Люди: Аминь.

Третий антифон

Во Царствии Твоем помяни нас, Господи,/ егда приидеши во Царствии Твоем./ Блажени нищий духом,/ яко тех есть Царство Небесное./ Блажени плачущии, / яко тии утешатся./ Блажени кротции, / яко тии наследят землю./ Блажени алчущии и жаждущии правды,/ яко тии насытятся./ Блажени милостивии, / яко тии помиловани будут./ Блажени чистии сердцем,/ яко тии Бога узрят./ Блажени миротворцы,/ яко тии сынове Божии нарекутся./ Блажени изгнани правды ради,/ яко тех есть Царство Небесное./ Блажени есте, егда поносят вам,/ и изженут, и рекут всяк зол глагол на вы, лжуще Мене ради./ Радуйтеся и веселитеся,/ яко мзда ваша многа на небесех.

Вход с Евангелием

Диакон: Премудрость, прости.

Люди: Приидите, поклонимся/ и припадем/ ко Христу./ Спаси ны/ Сыне Божий,/ во святых Дивен сый,/ поющия Ти:/ аллилуиа.

Тропари и кондаки

Глубиною мудрости человеколюбно вся Строяй,/ и полезное всем Подаваяй,/ Едине Содетелю./ Упокой души раб Твоих, на Тя бо упование возложиша,/ Творца и Зиждителя и Бога нашего.

Агнцу Пречистому и Пастырю последуя,/ Агнице словесная Татиано,/ мысленных зверей не убоялася еси,/ но знамением крестным вооружившися,/ до конца тех низложила еси/ и вошла еси в небесную ограду,/ идеже помяни и нас, мученице Христова многомудрая.

Слава Отцу и Сыну и Святому Духу.

Со святыми упокой,/ Христе, души раб Твоих,/ идеже несть/ болезнь, ни печаль,/ ни воздыхание,/ но жизнь бесконечная.

И ныне и присно и вовеки веков. Аминь.

Тебе и Стену, и Пристанище имамы,/ и Молитвенницу благоприятну к Богу,/ Егоже родила еси, Богородице безневестная,/ верных спасение.

Диакон: Господу помолимся.

Люди: Господи помилуй.

Иерей: Яко Свят еси, Боже наш, и Тебе славу возсылаем, Отцу и Сыну и Святому Духу, ныне и присно.

Диакон: И во веки веков.

Люди: Аминь.

Трисвятое

Святый Боже,/ Святый Крепкий,/ Святый Безсмертный,/ помилуй,/ помилуй нас./ (Трижды)

Слава Отцу и Сыну и Святому Духу, и ныне и присно и во веки веков. Аминь./  

Святый Безсмертный, помилуй нас./

Святый Боже,/ Святый Крепкий,/ Святый Бессмертный,/ помилуй нас.

Диакон: Вонмем.

Иерей: Мир всем.

Чтец Апостола: И духови твоему.

Прокимен

Субботы: Веселитеся о Господе, и радуйтеся, праведнии.

Заупокойный: Души их/ во благих водворятся.

Чтение Апостола. Когда чтение закончится, иерей говорит чтецу: Мир ти.

Чтец: И духови твоему.

Диакон: Премудрость.

Чтец: Аллилуиа, глас...

Люди: Аллилуиа (Трижды).

Чтение Евангелия

Иерей: Премудрость, прости, услышим святаго Евангелия. Мир всем.

Люди: И духови твоему.

Диакон: От (имя) святаго Евангелиа чтение.

Люди: Слава Тебе, Господи, слава Тебе.

Иерей: Вонмем.

И читается Евангелие. По окончании чтения:

Иерей: Мир те.

Люди: Слава Тебе, Господи, слава Тебе.

Ектения об усопших

Диакон: Помилуй нас, Боже, по велицей милости Твоей, молим Ти ся, услыши и помилуй.

Люди: Господи помилуй. (Трижды на каждое прошение).

Еще молимся о упокоении душ усопших рабов Божиих (имена) и о еже проститися им всякому прегрешению, вольному же и невольному.

Яко да Господь Бог учинит души их, идеже праведнии упокояются.

 Милости Божия, Царства Небеснаго и оставления грехов их у Христа, Бсзсмертнаго Царя и Бога нашего, просим.

Люди: Подай, Господи.

Диакон: Господу помолимся.

Люди: Господи, помилуй.

Иерей: Яко Ты еси воскресение, и живот, и покой усопших раб Твоих (имена), Христе Боже наш, и Тебе славу возсылаем, со Безначальным Твоим Отцем и Пресвятым и Благим и Животворящим Твоим Духом, ныне и присно и во веки веков.

Люди: Аминь.

Диакон: Елицы вернии, паки и паки миром Господу помолимся.

Люди: Господи, помилуй.

Диакон: Заступи, спаси, помилуй и сохрани нас, Боже, Твоею благодатию.

Люди: Господи, помилуй.

Диакон: Премудрость.

Иерей: Яко подобает Тебе всякая слава, честь и поклонение, Отцу и Сыну и Святому Духу, ныне и присно и во веки веков.

Люди: Аминь.

Малая ектения

Диакон: Паки и паки миром Господу помолимся.

Люди: Господи, помилуй.

Диакон: Заступи, спаси, помилуй и сохрани нас, Боже, Твоею благодатию.

Люди: Господи, помилуй.

Диакон: Премудрость.

Иерей: Яко да под державою Твоею всегда храними, Тебе славу возсылаем, Отцу и Сыну и Святому Духу, ныне и присно и во веки веков.

Люди: Аминь (протяжным распевом).

Херувимская песнь

Иже Херувимы тайно образующе/ и Животворящей Троице Трисвятую песнь припевающе,/ всякое ныне житейское отложим попечение.

Великий вход

Диакон: Великаго Господина и Отца нашего Кирилла, Святейшаго Патриарха Московскаго и всея Руси, и Господина нашего Высокопреосвященнейшаго Павла, митрополита Минскаго и Слуцкаго, Патриаршего Экзарха всея Беларуси, да помянет Господь Бог во Царствии Своем, всегда, ныне и присно и во веки веков.

Иерей: Преосвященныя митрополиты, архиепископы и епископы, весь священнический и монашеский чин, вас и всех православных христиан да помянет Господь Бог во Царствии Своем, всегда, ныне и прирно и во веки веков.

Люди: Аминь.

Яко да Царя всех подымем/ ангельскими невидимо/ дориносима чинми./ Аллилуиа, аллилуиа, аллилуиа.

Просительная ектения

Диакон: Исполним молитву нашу Господеви.

Люди: Господи, помилуй. (На каждое прошение).

О предложенных честных Дарех Господу помолимся.

О святем храме сем и с верою, благоговением и страхом Божиим входящих в онь, Господу помолимся.

О избавитися нам от всякия скорби, гнева и нужды, Господу помолимся.

Заступи, спаси, помилуй и сохрани нас, Боже, Твоею благодатию.

Дне всего совершенна, свята, мирна и безгрешна, у Господа просим.

Люди: Подай, Господи. (На каждое прошение).

Ангела мирна, верна наставника, хранителя душ и телес наших, у Господа просим.

Прощения и оставления грехов и прегрешений наших, у Господа просим.

Добрых и полезных душам нашим и мира мирови, у Господа просим.

Прочее время живота нашего в мире и покаянии скончати, у Господа просим.

Христианския кончины живота нашего, безболезнены, непостыдны, мирны, и добраго ответа на Страшном Судищи Христове, просим.

Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.

Люди: Тебе, Господи.

Иерей: Щедротами Единороднаго Сына Твоего, с Нимже благословен еси, со Пресвятым и Благим и Животворящим Твоим Духом, ныне и присно и во реки веков.

Люди: Аминь.

Иерей: Мир всем.

Люди: И духови твоему.

Диакон: Возлюбим друг друга, да единомыслием исповемы.

Люди: Отца и Сына и Святаго Духа, Троицу Единосущую и Нераздельную.

Диакон: Двери, двери, премудростию вонмем.

Символ веры

Верую во Единаго Бога Отца Вседержителя,/ Творца небу и земли, видимым же всем и невидимым./ И во Единаго Господа Иисуса Христа, Сына Божия,/ Единороднаго, Иже от Отца рожденнаго прежде всех век./ Света от Света, Бога истинна от Бога истинна,/ рожденна, несотворенна, единосущна Отцу, Имже вся быша./ Нас ради, человек, и нашего ради спасения сшедшаго с Небес,/ и воплотившагося от Духа Свята и Марии Девы, и вочеловечшася./ Распятаго же за ны при Понтийстем Пилате,/ и страдавша, и погребенна. воскресшаго в третий день по Писанием./ И восшедшаго на Небеса, и седяща одесную Отца./ И паки грядущаго со славою судити живым и мертвым, Его же Царствию не будет конца./ И в Духа Святаго, Господа Животворящаго, Иже от Отца исходящаго,/ Иже со Отцем и Сыном спокланяема и сславима, глаголавшаго пророки./ Во едину Святую Соборную и Апостольскую Церковь./ Исповедую едино Крещение во оставление грехов./ Чаю воскресения мертвых,/ и жизни будущаго века. Аминь.

Евхаристический канон

Диакон: Станем добре, станем со страхом, вонмем, Святое Возношение в мире приносити.

Люди: Милость мира, Жертву хваления.

Иерей: Благодать Господа нашего Иисуса Христа, и любы Бога и Отца, и причастие Святаго Духа, буди со всеми вами.

Люди: И со духом твоим.

Иерей: Горе́ имеим сердца.

Люди: Имамы ко Господу.

Иерей: Благодарим Господа.

Люди: Достойно/ и праведно есть/ покланятися Отцу/ и Сыну/ и Святому Духу,/ Троице/ Единосущной и Нераздельней.

Иерей: Победную песнь поюще, вопиюще, взывающе и глаголюще:

Люди: Свят, Свят,/ Свят Господь Саваоф,/ исполнь Небо и земля/ славы Твоея;/ осанна в вышних,/ благословен Грядый/ во Имя Господне,/ осанна в вышних.

Иерей: Приимите, ядите, Сие есть Тело Мое, еже за вы ломимое во оставление грехов.

Люди: Аминь.

Иерей: Пийте от нея вси, сия есть Кровь Моя Новаго Завета, яже за вы и за многи изливаемая во оставление грехов.

Люди: Аминь.

Иерей: Твоя от Твоих Тебе приносяще о всех и за вся.

Люди: Тебе поем./ Тебе благословим,/ Тебе благодарим,/ Господи,/ и молим Ти ся,/ Боже наш.

Иерей: Изрядно о Пресвятей, Пречистей, Преблагословенней, Славней Владычице нашей Богородице и Приснодеве Марии.

Люди: Достойно есть, яко воистинну/ блажити Тя, Богородицу,/ Присноблаженную и Пренепорочную/ и Матерь Бога нашего./ Честнейшую Херувим/ и Славнейшую без сравнения Серафим,/ без истления Бога Слова рождшую,/ сущую Богородицу Тя величаем.

Иерей: В первых помяни Господи, Великаго Господина и Отца нашего Кирилла, Святейшаго Патриарха Московскаго и всея Руси, и Господина нашего Высокопреосвященнейшаго Павла, митрополита Минскаго и Слуцкаго, Патриаршего Экзарха всея Беларуси, ихже даруй святым Твоим Церквам в мире, целых, честных, здравых, долгоденствующих, право правящих слово Твоея истины.

Люди: И всех и вся.

Иерей: И даждь нам единеми усты и единем сердцем славити и воспевати Пречестное и Великолепое Имя Твое, Отца и Сына и Святаго Духа, ныне и присно и во веки веков.

Люди: Аминь.

Иерей: И да будут милости Великаго Бога и Спаса нашего Иисуса Христа со всеми вами.

Люди: И со духом твоим.

Ектения просительная

Диакон: Вся святыя помянувше, паки и паки миром Господу помолимся.

Люди: Господи, помилуй. (На каждое прошение).

О принесенных и освященных Честных Дарех, Господу помолимся.

Яко да Человеколюбец Бог наш, приемь я во святый, и пренебесный, и мысленный Свой Жертвенник, в воню благоухания духовнаго, возниспослет нам Божественную благодать и дар Святаго Духа, помолимся.

О избавится нам от всякия скорби, гнева и нужды, Господу помолимся.

Заступи, спаси, помилуй и сохрани нас, Твоею благодатию.

Дне всего совершенна, свята, мирна и безгрешна,.у Господа просим.

Люди: Подай, Господи. (На каждое прошение).

Диакон: Ангела мирна, верна наставника, хранителя душ и телес наших, у Господа просим.

Прощения и оставления грехов и прегрешений наших, у Господа просим.

Добрых и полезных душам нашим и мира мирови, у Господа просим.

Прочее время живота нашего в мире и покаянии скончати у Господа просим.

Христианския кончины живота нашего, безболезнены, непостыдны, мирны, и добраго ответа на Страшнем Судищи Христове, просим.

Соединение веры и причастие Святаго Духа испросивше, сами себе, и друг друга, и весь живот наш Христу Богу предадим.

Люди: Тебе, Господи.

Иерей: И сподоби нас, Владыко, со дерзновением, неосужденно смети призывати Тебе, Небеснаго Бога Отца, и глаголати:

Люди: Отче наш, Иже еси на Небесех!/ Да святится Имя Твое, да приидет Царствие Твое,/ да будет воля Твоя, яко на небеси и на земли./ Хлеб наш насущный даждь нам днесь,/ и остави нам долги наша, якоже и мы оставляем должником нашим;/ и не введи нас во искушение,/ но избави нас от лукаваго.

Иерей: Яко Твое есть Царство, и сила, и слава. Отца и Сына и Святаго Духа, ныне и присно и во веки веков.

Люди: Аминь.

Иерей: Мир всем.

Люди: И духови твоему.

Диакон: Главы ваша Господеви приклоните.

Люди: Тебе, Господи.

Иерей: Благодатию, и щедротами, и человеколюбием Единороднаго Сына Твоего, с Нимже благословен еси, со Пресвятым и Благим и Животворящим Твоим Духом, ныне и присно и во веки веков.

Люди: Аминь (протяжным распевом).

Диакон: Вонмем.

Иерей: Святая святым.

Люди: Един Свят,/ един Господь/ Иисус Христос,/ во славу Бога Отца./ Аминь.

Причастны

В субботу: Радуйтеся, праведнии, о Господе, правым подобает похвала.

Заупокойный: Блажени, яже избрал и приял еси, Господи, и память их в род и род.

Аллилуиа (трижды).

В праздники Богородицы: Чашу спасения прииму и Имя Господне призову.

В праздники апостолов: Во всю землю изыде вещание их, и в концы вселенныя глаголы их.

В дни памяти святых: В память вечную будет праведник, от слуха зла не убоится.

Причастие

Иерей и с ним все, желающие причаститься: Верую, Господи, и исповедую, яко Ты еси воистину Христос, Сын Бога живаго, пришедый в мир грешныя спасти, от них же первый есмь аз. Еще верую, яко сие есть самое пречистое Тело Твое, и сия есть самая честная Кровь Твоя. Молюся убо Тебе: помилуй мя, и прости ми прегрешения моя, вольная и невольная, яже словом, яже делом, яже ведением и неведением, и сподоби мя неосужденно причаститися пречистых Твоих таинств, во оставление грехов, и в жизнь вечную. Аминь.Вечери Твоея тайныя днесь, Сыне Божий, причастника (причастницу) мя приими: не бо врагом Твоим тайну повем, ни лобзания Ти дам, яко Иуда, но яко разбойник исповедаю Тя: помяни мя, Господи, во царствии Твоем. Да не в суд или во осуждение будет мне причащение святых Твоих Таин, Господи, но во исцеление души и тела. Аминь.

Диакон, вынося Святую Чашу, возглашает: Со страхом Божиим и верою приступите! Передает Чашу священнику.

Люди: Благословен Грядый во Имя Господне, Бог Господь и явися нам. (В пасхальную седмицу поется “Христос воскресе...”).

Причащая мирян, иерей говорит: Причащается раб Божий (имя) Честнаго и Святаго Тела и Крове Господа и Бога и Спаса нашего Иисуса Христа, во оставление грехов своих и в Жизнь Вечную.

Люди (во время причащения): Тело Христово приимите, Источника безсмертнаго вкусите. (В пасхальную седмицу — “Христос воскресе...”).

Иерей: Спаси, Боже, люди Твоя и благослови достояние Твое,

Люди: Видехом Свет истинный,/ прияхом Духа Небеснаго,/ обретохом веру истинную,/ Нераздельней Троице покланяемся:/ Та бо нас спасла есть.

(Вместо “Видехом свет истинный...” от Пасхи до отдания поется “Христос воскресе из мертвых...”; от Вознесения до отдания — тропарь Вознесения; а в Троицкую родительскую субботу — “Глубиною мудрости...”)

Иерей: Всегда, ныне и присно и во веки веков.

Люди: Аминь. Да исполнятся уста наша/ хваления Твоего, Господи,/ яко да поем славу Твою,/ яко сподобил еси нас причаститися/ Святым Твоим, Божественным, Безсмертным и Животворящим Тайнам;/ соблюди нас во Твоей святыни,/ весь день поучатися правде Твоей./ Аллилуиа, аллилуиа, аллилуиа.

(В пасхальную седмицу: “Христос воскресе...”).

Диакон: Прости приимше Божественных, Святых, Пречистых, Безсмертных, Небесных и Животворящих, Страшных Христовых Тайн, достойно благодарим Господа.

Люди: Господи, помилуй.

Заступи, спаси, помилуй и сохрани нас, Боже, Твоею благодатию.

Люди: Господи, помилуй.

День весь совершен, свят, мирен и безгрешен испросивше, сами себе, и друг друга, и весь живот наш Христу Богу предадим.

Люди: Тебе, Господи.

Иерей: Яко Ты еси Освящение наше, и Тебе славу возсылаем, Отцу и Сыну и Святому Духу, ныне и присно и во веки веков.

Люди: Аминь.

Иерей: С миром изыдем.

Люди: О Имени Господни.

Диакон: Господу помолимся.

Люди: Господи, помилуй.

Молитва заамвонная

Иерей (стоя пред амвоном): Благословляяй благословящия Тя, Господи, и освящаяй на Тя уповающия, спаси люди Твоя и благослови достояние Твое, исполнение Церкве Твоея сохрани, освяти любящия благолепие дому Твоего; Ты тех возпрослави Божественною Твоею силою, и не остави нас, уповающих на Тя. Мир мирови Твоему даруй, Церквам Твоим, священником, воинству и всем людем Твоим. Яко всякое даяние благо, и всяк дар совершен свыше есть, сходяй от Тебе, Отца Светов; и Тебе славу, и благодарение, и поклонение возсылаем, Отцу и Сыну и Святому Духу, ныне и присно и во веки веков.

Люди: Аминь. Буди Имя Господне благословенно отныне и до века (трижды).

(На пасхальной седмице поется “Христос воскресе...”).

Иерей: Благословение Господне на вас. Того благодатию и человеколюбием, всегда, ныне и присно и во веки веков.

Люди: Аминь.

Иерей: Слава Тебе, Христе Боже, Упование наше, слава Тебе.

( На Пасху, в пасхальную седмицу и в отдание Пасхи вместо “Слава Тебе, Христе Боже...” священнослужители поют “Христос воскресе из мертвых, смертию смерть поправ”, а люди заканчивают: “И сущим во гробех живот даровав”. От Недели о Фоме до отдания Пасхи священник произносит: “Слава Тебе, Христе Боже, Упование наше, Слава Тебе”, а люди поют “Христос воскресе...” (Трижды).

Люди: Слава Отцу и Сыну и Святому Духу, и ныне и присно и во веки веков. Аминь. Господи, помилуй (Трижды). Благослови.

Иерей произносит отпуст. Христос…………

Многолетие

Люди: Великаго Господина и Отца нашего Кирилла,/ Святейшаго Патриарха Московскаго и всея Руси,/ и Господина нашего Высокопреосвященнейшаго Павла,/ митрополита Минскаго и Слуцкаго, Патриаршего Экзарха всея Беларуси./ Богохранимую страну нашу, настоятеля, братию и прихожан святаго храма сего,/ и вся православныя христианы,/ Господи, сохрани их на многая лета.

comments powered by Disqus